Archive for the ‘Opinion’ Category

நல்லாஇருங்கடா

ஜனவரி 7, 2008

ஹர்பஜன்சிங்கை மூன்று டெஸ்டு போட்டிகளில் இருந்து தடை செய்ததை எதிர்த்து போராட்டம் — செய்தி

நந்திகிரமுல நூத்துக்கணக்கான பேர் செத்துப்போனாங்க, ஒரு பொம்பளை புள்ளையை ஒட்டு துணி இல்லாம தெருவுல ஓட விட்டாங்க(அந்த புள்ளைக்கு துணி குடுக்குறதை விட்டுட்டு அதையும் சுத்தி சுத்தி படம் புடிச்சி TRB ரேட்டிங்கை ஏத்திகிட்டாங்க நம்ம மானங்கெட்ட பத்திரிக்கைகாரனுங்க).

இது வரைக்கும் நூத்துக்கணக்கான விவசாயிங்க சோத்துக்கு வழியில்லாம செத்து போயி இருக்காங்க.

நாட்டை எப்படிடா அமெரிக்காகாரனுக்கு அடகு வெக்கலாமுன்னு அதிகாரத்துல இருக்குற ஒரு கூட்டம் ரூம் போட்டு யோசிச்சிகிட்டு இருக்குது.

 இதை எல்லாம் தாண்டி நாட்டுல தினமும் நூத்துக்கணக்கான பிரச்சனை நடந்துகிட்டு இருக்குது.இதுக்கெல்லாம் கொதிக்காத இந்த கூட்டம் ஹர்பஜன்சிங்கை தடை செஞ்சதை கேட்டு கொதிச்சி போயி ரோட்டுல இறங்கி இருக்கு.

 பிரச்சனை இப்படி இருக்க CNN IBNல என்னடான்னா அவங்க அம்மாவை பேட்டி எடுக்குறாங்க, அவங்க பாட்டியை பேட்டி எடுக்குறாங்க,  பஞ்சாப்புல தலப்பா கட்டிட்டு ரோட்டுல யார் போனாலும், அவங்களுக்கு கிரிக்கெட் தெரியுதோ இல்லையோ அவங்களை எல்லாம் சுத்தி சுத்தி பேட்டி எடுக்குறாங்க.

களத்துல என்ன நடந்ததுன்னு யாருக்கு தெரியாது அதுக்குள்ள என் புள்ள தப்பே பண்ணலை, இதை எல்லாம் பாக்கும் பொழுது எனக்கு கோவம் கோவமா வருதுன்னு அவங்கம்மா(அந்தம்மாக்கு ஒரு 60-70 வயசாகும் அந்தம்மாவால சரியா பாக்க முடியுமான்னே தெரியலை) ஒரே சீன். ஏம்மா ஏன் ஏன் இந்த விளம்பரம் உங்களுக்கு?

 இது காலை நிலவரம் மதியதுக்கு மேல வேலை வெட்டி இல்லாம வூட்ல சும்மா இருக்குற கிரிகெட்டருங்க எல்லாம் மைக்கை எடுத்துட்டு ஆஸிக்களின் நிறவெறி, ICCயின் நிறவெறின்னு களத்துல ஆடுனாங்களோ இல்லையோ வாயால வடை சுட்டுட்டு கிளம்பிடுவாங்க.

 எங்க அடுத்த டெஸ்டு ஆடுனா சுலுகெடுதுடுவானுங்களோன்னு, நம்மாளுங்களும் இந்த பிரச்சனை முடியிற வரைக்கும் அடுத்த ஆட்டங்களை ஆட மாட்டோமுன்னு நம்மாளுங்க ஜகா வாங்கிடாங்க.

ஆஸ்திரேலியாகாரனுங்க வாய் கொழுப்பெடுத்தவனுங்க, அவனுங்ககிட்ட வாயும் இருக்கு ஆட்டமும் இருக்கு நமக்கு அப்படியா? பத்து பேர் சேர்ந்து 50 ஓவர் ஆட துப்பு இல்லாத நமக்கு எதுக்கு இந்த் வாய். முதல்ல ஆடுங்க அப்புறம் பேசுங்க.

ரோட்டுல இறங்கி போராடிகிட்டு இருக்கிற அண்ணனுங்களா அவரு ஆடுனாலும் காசு ஆடாட்டியும் காசு நமக்கு அப்படியா? நம்ம வாங்குற அஞ்சி பத்துக்கு இது தேவையா? போங்க போயி உருப்படுற வழியை பாருங்க.

சபாஷ் சரியான தீர்ப்பு

நவம்பர் 27, 2007

நாட்ல இந்த குறைந்த விலை விமான நிறுவனங்களின் தொல்லைக்கு ஒரு அளவே இல்லை. குறைந்த விலைக்கு விமான சேவையை அளிக்கிறேன் அப்படின்னு இவங்க அடிக்கிற லூட்டி இருக்கே யப்பா தாங்காது. விமானத்தில் போதிய பயணிகள் இல்லாட்டி, பயணிகளை பல மணி நேரம் காத்திருக்க செய்து அப்புறம் விமானத்தை கேன்ஸல் செய்வது, காலை விமானத்தில் கூட்டம் இல்லாட்டி அந்த விமானத்தில் உள்ள பயணிகளை அடுத்த விமானத்துக்கு மாற்றம் செய்வது, சில சமயம் விமானத்தை கேன்ஸல் செய்து அதுக்கு பதிலா ஆம்னி பஸ் டிக்கெட்டுகளை அளிப்பது, இது மாதிரி ஒரே ஆட்டம் தான். விமானம் கேன்ஸல் செய்யப்பட்டதற்கான காரணம் கேட்டால் தொழில்நுட்ப கோளாறு என்ற ஒரே பதில்.

இது மாதிரியான விமான கம்பெனிகளுக்கு ஆப்பு அடிக்கும் விதமாக இந்த தீர்ப்பு வந்துள்ளது. கோஏர் என்னும் குறைந்த கட்டண விமான நிறுவனம், தொழில்நுட்ப கோளாறு என்று கூறி கேன்ஸல் செய்த ஒரு விமானதில் பயணம் செய்த பயணிகள் அனைவருக்கு 15000 நஷ்டஈடு அளிக்குமாறு தில்லி உயர்நீதி மன்றம் உத்திரவிட்டுள்ளது. இது போன்ற வியாபார நன்னடத்தை (Business ethics) இல்லாத கம்பெனிகள் இதற்கு பிறகாவது திருந்தினால் சரி.

206. இது தாங்க உண்மை

ஒக்ரோபர் 1, 2007

சேது சமுத்திர திட்டம் நிறைவேற்றப்பட வேண்டும் என்று உண்மையான அக்கரை உள்ளது போல தி.மு.காவும் அதன் கூட்டணி கட்சிகளும் நாடகமாடுகின்றன அவர்களுக்கு ஈடுஈணையாக எதிர்கட்சிகளும் நாடகம் ஆடுகின்றன. உண்மையான அக்கரை இருந்தால், இந்த திட்டம் விரைவாக முடிக்கபடாவிட்டால் நாங்கள் எங்களின் ஆதரவை வாபஸ் வாங்கிக்கொள்வோம் என்று சொல்ல வேண்டியது தானே? பேரனுக்கு அமைச்சர் பதவி பெற்றுத்தர டில்லிக்கு நடையா நடந்தவர், தமிழ்நாட்டின் வாழ்வாதார பிரச்சனையான இந்த பிரச்சனைக்கு ஒரு பந்த்/உண்ணாவிரத்த்தோட முடிச்சிக்கிட்டாரு.

அதையாவது ஒழுங்கா செய்தாரா? பதவி என்பது எனக்கு துண்டு போல, மானம் என்பது வேட்டி (எனக்கு சரியாக தெரியவில்லை இது போன்ற பொருள் தரக்கூடிய வாக்கியம் ஒன்றை சொல்லி இருந்தார்) போல அப்படின்னு சொன்னவரு. ஆனா இன்னிக்கு பாருங்க பந்த் நடத்தியது தவறு, தமிழகத்தில் ஏன் ஜனாதிபதி ஆட்சியை அமல்படுத்த கூடாது அப்படின்னு கேட்ட உடனே, நம்ம தலைவரு துண்டை கையில புடிச்சிகிட்டு உண்ணாவிரத பந்தலில் இருந்து கிளம்பி போயி கோட்டையில உட்கார்ந்து கொண்டார். ஏன் சாமி எனக்கு பதிவி போனாலும் பரவாயில்லை சேது சமுத்திர கால்வாய் தான் முக்கியம் அப்படின்னு முழு நாளும் உக்கார வேண்டியது தானே? இவரு கதை தான் இப்படின்னா,

பிஜேபி ஆட்சியில் இந்த சேது சமுத்திர திட்டத்தை நிறைவேற்ற முடிவு செய்த பொழுது இன்னொரு தலைவரு, வெற்றி வெற்றி தமிழகத்தின் வாழ்வாதார பிரச்சனையை நிறைவேற்றி விட்டோம், அப்படின்னு அழுகாச்சியோட கூவிகினே தமிழ்நாடு முழுவது சுத்தினாரு, அப்ப தெரியலையா அவருக்கு ராமர் பாலத்தை இடிப்பாங்கன்னு, இப்ப கட்சி மாறின உடனே சகோதரி பாசத்துல அய்யோ பாலத்தை உடைக்கிறாங்களே எப்பேர்பட்ட பாலம் அப்படின்னு ஒரே சவுண்டு இவரு.

அம்மா என்னடான்னா சீன் ஓப்பனிங்கல சவுண்டே இல்லாம இருந்தாங்க, ராமரு சீன்ல வந்த உடனே, அய்யோ இடிக்கிறாங்களே இடிக்கிறாங்களே அப்படின்னு சவுண்டு, அடுத்து பந்த் நடத்தறாங்களேன்னு ஒரு சவுண்டு. அடுத்து ஆளுங்கட்சிகளே சும்மா இருக்கும் பொழுது இவங்க “பந்த் வெற்றி பந்த் வெற்றி அப்படின்னு” சவுண்டு விட்டு, ஆட்சியை கவிழ்க்க பாக்குறாங்க.

நல்ல வேளை இந்த விசயத்துல கூத்தாடிங்க அவ்வுளவா சவுண்டு விட்டு மாட்டிகலை, இல்லாட்டி அவனுங்க சாயமும் இதுல வெளுத்து போயி இருக்கும்.

இப்படி அரசியல கட்சிங்க தான் இருக்காங்கன்னா, நம்ம மக்களை பாருங்க அவங்க மாநிலத்தின் முதல்வரின் தலைக்கு ஒரு சாமியார் விலை வைக்கிறார் அதை எதிர்த்து ஒருத்தன் கூட சவுண்டு விடலை(ஒரு வாரம் கழிச்சி ஏதோ நாலு கல்லு வுட்டாங்க அம்முட்டு தான்). இதுவே மத்த மாநிலங்களில் நடத்து இருந்த என்ன நடத்து இருக்கு யோசித்து பாருங்க.

இந்த சேது சமுத்திர திட்டத்துல ரெண்டு மேட்டர் தெளிவா புரியுதுங்க, ஒண்ணு தமிழன் மானெங்கெட்டவன், கோழை, சுயநலவாதி, ஒற்றுமை இல்லாதவன், எவன் எக்கேடு கேட்டா நமக்கு என்ன அப்படின்னு இருப்பான். இன்னொன்னு தமிழநாட்டோட முன்னேற்றத்துக்கு எந்த கட்சியும் பாடுபடலை.

சேது சமுத்திர திட்டம் ஒரு உதவாக்கரை திட்டம் அப்படின்னு நரேன் இங்க அழகா சொல்லி இருக்காரு போயி படிச்சித்தான் பாருங்க.

205. சர்தார்கள் பிச்சை எடுப்பதில்லை

ஜூலை 20, 2007

இன்று காலை வழக்கமாக வரும் forward மின்னஞ்சலில் சர்தார்கள் உழைத்து தான் சாப்பிடுவார்கள் என்றும், பிச்சைக்கார சர்தார்களை எங்கேயும் பார்க்க முடியாது என்று கூறி உள்ளனர். அதே மாதிரி வயதான, மன நலம் குன்றிய சர்தார்கள் மற்றும் ஏதோ ஒரு காரணத்தினால் சம்பாதிக்க முடியாத சர்தார்களை அவர்களின் குருத்துவாரா(அவர்களின் கோவில்) தத்து எடுத்துக்கொள்ளுமாம். அட ஆமாம்! நான் கூட சர்தார்கள் பிச்சை எடுத்து பார்த்தது இல்லை.எந்த அளவுக்கு இந்த செய்தி உண்மை என்று தெரியவில்லை, நீங்க யாராவது சர்தார்கள் பிச்சை எடுத்து பார்த்து இருக்கீங்களா? அவங்களை மடப்பசங்க மடப்பசங்க அப்படின்னு ஜோக்கடிச்சி இதை எல்லாம் கேக்கும் பொழுது யாரு மடப்பசங்க?..

203. பரதன் இந்த பொழப்புக்கு நல்லா வாயில வருது

ஜூலை 11, 2007

Devil’s advocate என்ற நிகழ்ச்சியில் கரண் தப்பார் CPI கட்சியின் இந்திய பொது செயலாளர் பரதனுடன் பேட்டி காண்கிறார். இந்த பேட்டி சாராம்சம் பிரதீபா பாட்டீல் போன்ற ஒரு ஊழவாதி, பிற்போக்கு சிந்தனை கொண்ட ஒரு பெண் இந்திய ஜனாதிபதியாக போட்டி இட தகுந்தவரா? நீங்களே இந்த வீடியோவை பாருங்க பரதன் அவரிடம் என்ன பாடு படுகிறார் என்று.

முதல் வீடியோ

இரண்டாம் வீடியோ

மூன்றாம் வீடியோ

இந்த பேட்டி முழுவதும் கரண் மூன்றே மூன்று குற்றச்சாட்டுகளை தான் வைக்கிறார்.

1. பிரதீபா தலைவராக இருந்த ஒரு மகளரிருக்கான முன்னேற்ற வங்கியில் அவரது குடும்பத்தினர் கோடிக்கணக்கில் கடன் வாங்கி வங்கி திவாலாக காரணமாக இருந்து இருக்கின்றனர். அவரது சகோதரன் சுமார் 20 லட்ச ரூபாய் அளவுக்கு தொலைபேசியை பயன்படுத்தி இருக்கிறார், SC/ST பிரிவினருக்காக ஒதுக்கீடு செய்யப்பட்ட வேலையை தன்னுடைய சொந்த பந்தங்களுக்கு பெற்று தந்து இருக்கிறார். அகமதாபாத் நீதிமன்றத்தில் இவர் மீது வழக்கு தொடரப்பட்டு அதில் இவர் 8வது குற்றவாளியாக இருக்கிறார். இப்படிப்பட்ட ஊழல் வாதியை, நிர்வாக திறமையற்றவரை எநத அடிப்படையில் வேட்பாளராக தேர்ந்து எடுத்தீர்கள்?

பதில் : I. பிஜேபி காரனுங்க ஊழல் செய்யவில்லையா? காங்கிரஸ்காரனுங்க ஊழல் செய்யலையா? இவை எல்லாம் எதிர்கட்சியின் அவதூறு.

II. அவங்க அண்ணன் தம்பிங்க செய்த தப்புக்கு இந்த அப்பாவி பொம்பளை என்ன செய்வாங்க?

III. வழக்கு தானே தொடர்ந்து இருக்காங்க இன்னும் தீர்ப்பு வரவில்லையே?

2. பரம்பரை வியாதி உள்ளவர்களுக்கு கட்டாயமாக தடுப்பூசி போடப்படும் என்று பிரதீபா கூறி இருக்கிறார். இந்த செயலை நீங்கள் அனுமதிப்பீர்களா? நாளையே இவர் ஜனாதிபதியாகி இதை நாடு முழுவதும் செயல்படுத்த மாட்டார் என்பது என்ன நிச்சயம்?

பதில் I. இல்லை நான் இதை ஒத்துக்கொள்ள மாட்டேன். வழக்கம் போல ஜல்லி பதில்கள்.

3. ஒரு ஜனாதிபதி வேட்பாளர் தனக்கு ஆவிகளின் மீது நம்பிக்கை இருக்கிறது என்றும், 1969 ஆம் ஆண்டு இறந்த ஒருவருடன் பேசி இருக்கிறேன் என்றும், வேட்பாளராக அறிவிக்கப்பட்ட பிறகு கூறுகிறார் இதைப்பற்றி உங்களின் கருத்து என்ன?

பதில் I. முதலில் சிரிக்கிறார் பிறகு, காங்கிரஸ் பி.ஜே.பி கட்சியில் கூட இது போல இருக்கின்றனர் என்று கூறுகிறார்.

பதில் II. ஜனாதிபதியான பின்னாடி இது மாதிரி செய்ய மாட்டார் என்று கூறுகிறார்.

இறுதியாக கரண் கேட்கிறார். ஒரு Potentially ஊழல்வாதி, ஆவிகளை நம்பும் ஒரு பிற்போக்கு சிந்தனைவாதி, forced sterilization சிந்தனை உடைய ஒரு பெண்மணியை நீங்கள் இன்னும் வேட்பாளராக பரிந்துரை செய்கிறீர்கள்?

அதற்கு பரதன் கூறுகிறார் “அவருக்கு 40 வருட அரசியல் அனுபவம் இருக்கிறது”.

பரதன் போன்ற மூத்த அரசியல்வாதியிடமிருந்து இது போன்ற ஒரு பேட்டியை எதிர்பார்க்கவில்லை. கேவலமான சமாளிப்புக்கள், மொத்தத்தில் கம்யூனிஸ்டுகளும் திரவிட கட்சிகளுக்கு எந்த விதத்திலும் சளைத்தவர்கள் அல்ல என்று நிரூபித்து உள்ளனர்.

பிரதீபாவின் நிலைமை தான் இப்படி என்றால் பைரவ் சிங்க ஷகாவத்தின் நிலைமை இன்னும் மோசம். காவலராக வேலை செய்து கொண்டு இருந்த பொழுது லஞ்சம் வாங்கிய குற்றத்திற்காக அவரை பணிநீக்கம் செய்து இருக்கிறார்கள். அவர் முதல்வராக இருந்த பொழுது தவறான நடத்தை உள்ள பெண்களுக்கு பல முக்கிய பதிவிகளை அளித்தாக குற்றச்சாட்டு. இதற்கு பி.ஜே.பி தலைவர் ராஜ் நாத் சிங்கின் ஒரே பதில் “அவரை எனக்கு பல வருடங்களாக தெரியும் அவர் நல்லவர் வல்லவர். இது எல்லாம் எதிர்கட்சிகளின் திட்டமிட்ட குற்றச்சாட்டு”

so இந்தியாவின் அடுத்த ஜனாதிபதி ஒரு ஊழல்வாதி, பொது சொத்துக்களை குடும்பத்துடன் கொள்ளையடிக்கும், ஆவிகளுடன் பேசும் பழமைவாதி பெண்மணியா? அல்லது லஞ்சம் வாங்கும், பலான பெண்கள்க்கு பதவியை வாரி வழங்குபவரா என்பதே மில்லியன் டாலர் கேள்வி.

202. புதிய உலக அதிசயங்களும் ஏமாளி இந்தியர்களும்

ஜூலை 8, 2007

புதிய உலக அதிசயங்களை தேர்ந்து எடுக்குறேன் அப்படின்னு சுவிட்சர்லாந்தை ஒரு தனியார் நிறுவனம் new7wonders கிளம்பி இருக்கு. அவங்க யாரு அப்படிங்கறத்துக்கு சரியான விளக்கம் இல்ல (ஆனால் அவர்கள் தாங்கள் ஒரு profitable organisation என்பதை தெளிவாக கூறி இருக்கின்றனர்.). எந்த நாட்டின் அரசாவது இவர்களை அங்கீகரித்து இருக்காங்களா? அப்படி எதுவும் தெரியலை. ஜ.நாவும் இவங்களை அங்கீகரிச்ச மாதிரி தெரியலை. ஆனாலும் உலக அதிசியங்களை தேர்ந்து எடுக்குறேன் அப்படின்னு ஒரு ஏகப்பட்ட சுற்று தேர்தலை நடத்தி பொதுமக்களிடம் இருந்து ஒரு கணிசமான தொகையை கறந்துவிட்டாங்க. 1999 ஆம் வருசம் ஆரம்பித்த இந்த சுரண்டல் நேற்று முடிந்தது.

இவர்களின் தேர்தலை முறையை பாருங்களேன். யார் வேண்டுமானாலும் எதை வேண்டுமானாலும் உலக அதிசயங்களாக பரிந்துரை செய்யலாம். அப்புறம் ஓட்டெடுப்பின் வாயிலாக உலக அதிசயங்களை தேர்ந்து எடுப்பதாக சொல்லி இருக்கின்றனர். ஆனால் ஒட்டெடுப்பு முறையில் ஒருவர் ஒன்றுக்கும் மேற்பட்ட ஒட்டளிக்க எவ்விதமான தடையும் இல்லை. ஒன்றுக்கும் மேற்பட்ட ஒட்டுக்களை அளிக்க வேண்டுமானால் தொலைபேசி அல்லது குறுஞ்செய்தி வசதிகளை உபயோகப்படுத்துங்கள் என்று அவர்களின் தளத்திலேயே பரிந்துரை செய்துள்ளனர். ஏனெனில் நீங்கள் தொலைபேசி அல்லது குறுஞ்செய்தி வழியாக ஒவ்வொரு முறையும் ஓட்டளிக்கும் பொழுதும் இவர்களுக்கு ஒரு கணிசமான தொகை செல்கிறது இதன் மூலம் இந்நிறுவனம் பல கோடி வருவாயை ஈட்டி உள்ளது.

இந்த போட்டியின் முடிவுகளை இவர்கள் நேற்று அவர்களின் இணைய தளத்தில் அறிவித்து இருக்கின்றனர், மொத்தம் கிடைத்த ஓட்டுக்கள் எத்தனை அது போன்ற எந்த ஒரு விபரமும் இல்லை. அதே போல வெற்றி பெற்ற இடங்களை பாருங்கள் பெரும்பாலும் தென் அமெரிக்க நாடுகளில் உள்ள இடங்களே (மொத்தம் 7 அதிசயங்களில் 3 தென் அமெரிக்க நாட்டில் உள்ளவை). ஏனெனில் அந்த நாடுகளில் உள்ளவர்கள் தான் அதிகபடியாக ஒட்டளித்து உள்ளனர்.

இந்த நிறுவனத்துக்கு ஜக்கிய நாடுகளின் (பொதுவாக இந்த உலகத்தின் பழமையான இடங்களை அங்கீகாரம் செய்வது ஜக்கிய நாடுகளின் ஒரு உபநிறுவனமான UNESCO – United Nations Education, Scienticfic and Cultural Organisation ஆகும்.) அங்கீகாரமோ இல்லை உலக நாடுகளின் அங்கீகாரமோ இல்லை அப்படி இருந்த பொழுதும் எப்படி இந்த ஊடகங்கள் அவங்க போட்ட ஜந்து,பத்து பிச்சைக்கு ஆசைப்பட்டு இதை இப்படி தாங்கிப்பிடிக்கின்றன என்று தெரியவில்லை? உள்ளூர் ஊடகம் தினமலர் முதல் கொண்டு சர்வதேச உடகங்கள் வரை இடத்துக்கு தகுந்த மாதிரி உங்க ஊருக்கு ஓட்டு போடுங்க அப்படின்னு மக்களை உணர்வுப்பூர்வமாக ஏமாற்றி புண்ணியம் தேடிக்கொண்டது. சில பொட்டி தட்டும் கலைஞர்களும் உணர்ச்சி பெருமும் இமெயில் மூலமாக இதை பலருக்கு கொண்டு சென்று புண்ணியம் தேடிக்கொண்டனர்.

இதுல ஒரு காமெடி என்னானா மதுரை மீனாட்சி அம்மன் கோவிலும் முதல் 200 இடங்களில் வந்ததும். அதுக்கு தமிழக அரசே கோவிலுக்குள் ஓட்டளிக்க வசதி செய்து கொடுத்தது தான். மீனாட்சி அம்மன் கோவில் எந்த வகையில் architectural acheivement என்று தெரியவில்லை. அப்படி பார்த்தால் தஞ்சை பெரிய கோவில், இராமேஸ்வரம் கோவில் போன்றவை ஏன் தேர்ந்தெடுக்க வில்லை? மதுரை மீனாட்சி கோவிலில் கூட்டம் அதிகமாக வருகிறது நல்லா கல்லா கட்டலாம் என்பதாலா?

இதுல செம காமெடி எகிப்திய பிரமீடுகள் 7 உலக அதிசயங்களுல் இல்லையாம். வாக்கெடுப்பு முடிந்த உடன் கிரேக்க பிரமீடுகள் முதல் 7 இடங்களில் இடம்பெறாதது கடுமையான விமர்சனங்களுக்கு ஆளானது. அதைப்பற்றி கேட்ட பொழுது அந்த நிறுவனத்தின் செய்தியாளர் சொல்கிறார் “We absolutely had no problem with this,” Viering told the AP. As of Saturday, there will be eight world wonders including the Pyramids of Giza, she added. அடடா இது தெரிஞ்சி இருந்தா நாலு லாரியில் ஆளுங்களை கூட்டிட்டு போயி அவனுங்களை மிரட்டி எங்க தாத்தாவோட பழைய வீட்டையும் இதுல சேர்த்து இருப்பேனே.

அடுத்தா இவனுங்க உலகத்தின் இயற்கையால் ஏற்படுத்தப்பட்ட இடங்களுக்கான தேர்தலை துவக்கி இருக்கிறார்கள். எவனாவது ஒரு புண்ணியவான் கூவம் நதியையும் அதன் நதிக்கரையையும் அதுல சேர்த்துவிட உள்ளூர் ஊடகங்களும் அதை ஊதிவிடும், வெட்டியா இருக்கும் பொட்டி தட்டும் கோஷ்டி அதுக்கும் நெஞ்சை நக்குற மாதிரி ஒரு இமெயிலை ரெடி பண்ணி fwd பண்ணும். தேர்தலுக்கே ஓட்டு போடாத உண்மை இந்தியர்கள் அதையும் உண்மையென நம்பி அதுக்கு கைகாசு போட்டு ஓட்டுப்போடுவான் நல்லா இருங்கடா.

200. கலக்குது இளசு

ஜூலை 5, 2007

ஒரு நல்ல விஷயம் அல்லது ஒரு பொருளை எப்படி கெடுத்து குட்டி சுவர் ஆக்க முடியும் அப்படிங்கிறதுக்கு ஆர்குட் ஒரு அருமையான உதாரணம். ஒரு காலத்தில் படித்த நண்பர்களை எல்லாம் சில பேர் கண்டுபிடித்து சந்தோசப்பட்டுக்கொண்டு இருக்கும் வேளையில். அதையே நாடுகளுக்கும், சமுதாயங்களுக்கும் எதிரான கருத்துக்களை பரப்பி அதை தடை செய்யும அளவுக்கு அழித்து குட்டிச்சுவர் ஆக்கிக்கொண்டு இருக்கிறது ஒரு கூட்டம். அதையே நல்ல விஷயத்துக்கும் உபயோகப்படுத்த முடியும் என்று ஒரு இளைஞர் கூட்டம் நிரூபித்து உள்ளது.

உங்களுக்கு எல்லாம் தெரிந்து இருக்கும் ஆர்குட்டில் குழுக்களை உருவாக்க முடியும் என்று. அப்படி ஒரு குழு தான் “upliftment of the orphans” என்ற குழு. இதில் உள்ள இளைஞர்கள் மற்றும் இளைஞிகள் மாதம் ஒரு முறை ஒரு அனாதை இல்லத்தை தேர்ந்து எடுத்து அதில் உள்ள குழந்தைகளுக்கு நேரில் சென்று தன்னாலான உதவிகளை செய்கின்றனர். இதை செய்யும் அனைவரும் 25 அல்லது 26 வயதுக்குள்ளான இளைஞர்கள். எனக்கு தெரிந்த வரையில் அனைவரும் தன்னுடைய சொந்த காசையே இதற்கு செலவு செய்கின்றனர். சென்னையில் துவங்கிய இவர்களது பணி ஹைத்திரபாத்திலும் துவங்கியுள்ளது.

இவர்களைப்பற்றி மேலும் விவரம் அறிய இவர்களின் ஆர்குட் குழுமத்தை இங்கே கிளிக்கி பாருங்க (இதை பார்க்க உங்களுக்கு ஆர்குட் account அல்லது கூகுள் account தேவை). இவர்கள் மாதம் ஒரு முறை, பெரும்பாலும் பிரபலமில்லாத ஒரு அனாதை இல்லத்தை தேர்ந்து எடுத்து அவர்களை தொடர்பு கொண்டு அவர்களின் தேவையறிந்து தங்களால் என்ன முடியுமோ அதை செய்கின்றனர். இவர்கள் அடுத்து எந்த இல்லத்தை சென்று பார்க்க போகிறார்கள் போன்ற விவரங்களை பற்றி மேலும் விவரம் அறிய அவர்களின் குழுமத்தில் உள்ள “topic” பகுதியினை பாருங்க.

நான் இந்த வயதில் இதை பற்றி எல்லாம் யோசித்து கூட பார்த்தது இல்லை. ஏதோ யாராவது வந்து கேட்டால் என்னால் முடிந்ததை குடுப்பதோடு சரி. இன்றைக்கு பொழுது போக்கவும், பணத்தை செலவு செய்யவும் பல இடங்களும் வழிகளும் இருந்தும் கூட அதையும் தாண்டி இது போன்ற நல்ல காரியங்களை செய்யும் நீங்கள் உண்மையிலேயே பாராட்டுக்கு உரியவர்கள். Hatsoff guys you are doing a very wonderful job.

192. இவர்களுக்கு எப்படி வந்தது இந்த தைரியம்?

ஜூன் 8, 2007

ஒரு இன்ஸ்பெக்டரை நடுரோட்டில் தீ வைத்து கொளுத்துகிறது ஒரு வன்முறை கும்பல். அவருக்கோ தன்னை காப்பாற்றிக்கொள்ளவே சக போலீசார் உதவ வேண்டிய நிலை (“ஒரு நடுநிலைமை நாழிதல்” இதை ஒரு விபத்தாக கதை கட்டுகிறது. என்னே உங்க மனித நேயம் மற்றும் பத்திரிக்கை தர்மம்).

ஒரு ரவுடிக்கும்பல் ஒரு பத்திரிக்கை அலுவலகத்துக்குள் புகுந்து அடித்து நொறுக்கிவிட்டு இரண்டு மூன்று பேரை கொன்றுவிட்டு வெற்றிகரமாகா வெளியே வருகிறது.

கரூரில் இரு கட்சியினர் தாக்கிக்கொள்வதால் பஸ் நிறுத்தம் பள்ளிகள் மூடல்.

லேட்டஸ்டா தூத்துக்குடி ஆ.தி.மு.க அலுவலகம் முன்பு பெட்ரோல் குண்டு வீச்சு.

இவை மட்டும் அல்லாது தினமும் தலைப்பு செய்திகளாக வரும் ஆள் கடத்தல், கட்ட பஞ்சாயத்து என தமிழகம் முழுவதும் நீக்கமற நிறைந்து இருக்கும் குற்றங்கள். ரவுடிகளை கண்டு பொது மக்களும், தொழில்துறையினரும் நடுங்கும் நிலை.

பெரிய அளவிலான கலவரங்களை ஏற்படுத்த உபயோகப்படுத்தப்பட்ட பெட்ரோல் வெடிகுண்டுகள் எல்லாம் தற்பொழுது சாதாரண ஆயுதமாகிவிட்டது. எங்கே போகிறது தமிழகம்? ஜனநாயக தமிழகத்தில் தான் வாழ்கிறோமா? சட்டம் ஒழுங்கு காவல்துறையின் கட்டுப்பாட்டில் தான் இருக்கிறதா? என்று அச்சம் கொள்ள வைக்கிறது.

ஸ்காட்லாண்டு யார்டுக்கு இணையாக சொல்லப்படும் தமிழக காவல் துறைக்கு ஏன் இந்த நிலை ஏற்பட்டது, இந்த சமூக விரோதிகளுக்கு எப்படி வந்தது இவ்வுளவு தைரியம் :

மக்கள் தான் உங்களின் உண்மையான எஜமானர்கள் என்று மறந்து, மாமூலுக்கும், “வழமையான” ஏரியா மாறுதலுக்கும் ஆசைப்பட்டு அரசியல்வாதிகளின் வீடுகளில் காவல்காரகளாக மாறியதாலா?

எந்த கட்சி ஆட்சிக்கு வந்தாலும் அவர்களின் மீது தன்னுடைய விசுவாசத்தை காட்ட எதிர்கட்சியினர் மீது வேட்டைநாய்கள் மாதிரி பாய்வதும், ஆளுங்கட்சியினர் கண்டால் வாலை குழைத்து செல்வதாலா?

ஏரியாவாரியாக சமூகவிரோத செயல்கள் செய்பவர்களுடன் கூட்டணி அமைத்து, கமிஷன் முறையில் வேலை பார்ப்பதாலா?

மாமன் மச்சான் அவன் இவன் என்று தகுதிகள் எதுவும் இல்லாத தற்குறிகளுக்கும் யார் அதிகமாக லஞ்சம் கொடுக்கிறார்களோ அவர்களுக்கு காவல்துறையில் வேலைவாய்ப்பும், பதவி உயர்வும் கொடுப்பதாலா?

இவை எல்லாம் செய்தது பத்தாது என்று செந்தமாகவே வழிப்பறி, கொள்ளை, கற்பழிப்பு என்று இறங்கியதாலா?

போதும் இந்த அரசியல் கட்சிகளை ஆதரிக்கும் போக்கு. போதும் ஒரு கட்சியை ஆதரித்தால் அடுத்த கட்சியின் ஆட்சியின் பொழுது பந்தாடப்பட்டதும், அடிப்பட்டதும். எங்கே போய் விட்டது உங்களின் பழைய மிடுக்கும், அஞ்சா நெஞ்சமும், மக்களுக்கு உதவும் போக்கும். இது எல்லாம் இல்லாமல் போலீஸ் உடை அணிந்து கண்ணாடியில் பார்க்கும் பொழுது உங்களுக்கே வெட்கமாக இல்லை?

இந்த நிகழ்வுகளுக்கு பின்னராவது மக்கள் தான் உங்களை நேசிக்கும் உண்மையான எஜமானர்கள் என்பதை புரிந்து கொண்டு, உங்களிடையே இருக்கும் கசடுகளை கழித்து, பழைய பொழிவுடன் உலகத்தில் உள்ள மற்ற காவல்துறைக்கு நீங்களும் சளைத்தவர்கள் அல்ல என்பதை நிருபிப்பீர்கள் என்ற நம்பிக்கையுடன் வாழும் தமிழகத்தின் ஒரு அப்பாவி தமிழன்.

187. சேதி தெரியுமா உங்களுக்கு

மே 21, 2007

“ரஜினியும் ஸ்ரேயாவும் பாடல் காட்சியில் நெருங்கி நடிக்கும் போது, ஸ்ரேயாவின் தொப்புளை ரஜினி விரலால் வருடுவது போல காட்சி எடுக்கப்பட்டிருந்ததாம். இந்த காட்சியை வெட்டிவிட வேண்டும் என்று சென்சார் அதிகாரிகள் சொல்ல, “இதில் ஏதும் ஆபாசமில்லை. கலை நயத்துடன் தான் இந்த காட்சி படமாக்கப்பட்டுள்ளது’ என்று இயக்குனரின் தரப்பில் சொல்லப்பட்டுள்ளது. “இதற்கு பதில் வேறு காட்சியை சேர்த்துக் கொள்ளுங்கள். இக்காட்சியை நீக்கினால் தான், “யு’ சர்ட்டிபிகேட் கொடுப்போம். இல்லாவிட்டால், “ஏ’ சர்ட்டிபிகேட் தான்’ என்று சென்சார் தரப்பில் உறுதியாக சொன்னார்களாம். அதன் பிறகு அந்த காட்சிக்கு பொருத்தமான வேறு காட்சி சேர்க்கப்பட்டுள்ளது” — நன்றி தினமலர்

அடடா என்ன ஒரு கலைக்கண்ணு இவங்களுக்கு, ஒரு 55 வயசு இளைஞர் (?$#&%) நெருக்கமான காட்சியில் தன் பேத்தி வயதுள்ள ஒரு பெண்ணின் தொப்புளை வருடுவது கலைநயமாமே? இது பத்தாது என நம்ம சின்ன கலைவாணர் இரட்டை அர்த்த வசனத்தில் பின்னி பெடல் எடுத்து இருக்காராம். சென்சார் போர்டு “U” certificate கொடுக்க முடியாதுன்னு சொன்ன பின்னாடி அந்த இடத்தில் பெரிய மனசு பண்ணி “mute” வேண்டுமானால் செய்துகொள்கிறோம் அப்படின்னு சொய்தார்களாம். ஆனா வாய் அசைவை வைத்து அது என்ன என்று பிறந்து பேச ஆரம்பிக்கும் குழந்தை கூட சொல்லிடுமாம்.

அட ராமா! (இந்த ராமர் “அந்த” ராமர் இல்லிங்கோ) நம்ம வீடுகளில் எல்லாம் ரஜினி படம் அப்படின்னா “அந்த” பயம் இல்லாம குடும்பத்தோட போகலாம் அப்படிங்கிற நம்பிக்கையில் இப்படி புல்டோசரை விட்டு ஏத்தி இருக்கிங்களே இது நியாயமா தலைவரே?

யப்பா தேவர் குலவிளக்கு சின்ன கலைவாணரே (பாவம் கலைவாணர் கேட்டு இருந்தா நாண்டுகிட்டு செத்து இருப்பாரு), High Pitchல உபதேசம் எல்லாம் ஊருக்கு தானா? நீங்க அப்படி இருங்க இப்படி இருங்க அப்படின்னு ஊருக்கு சொல்றது இருக்கட்டும் முன்னாடி நீ நடந்து காட்டு ராசா.

எந்த கருமத்தை எடுத்து இருந்தாலும் காசை அள்ள தான் போறீங்க இந்த லட்சணத்தில் எதுக்கு இன்னும் சதையையும் இரட்டை அர்த்த வசனங்களையும் நம்பணும். சமுதாய சிந்தனை எல்லாம் கொஞ்சம் கூட இல்லையா தலை? என்னவோ போங்க தலை காசை எப்படி வேணா சம்பாதிக்கலாம். நம்மளை வளர்த்த சமுதாயத்துக்கு நாம் என்ன திருப்பி செய்தோம் அப்படிங்கிறது தான் மேட்டரு.

எதிர்ப்பார்க்கப்படும் ஜல்லி பின்னூட்டங்கள் :

1. “மத்த படத்துல எதை எதையோ காட்டுறாங்க நாங்க தொப்புளை தானே காட்டுறோம்?” பதில் “அவங்க தின்னா நீயும் திம்பியா (அவங்க எதை திங்கிறாங்க அப்படின்னு தெரிந்து கொள்ள தனி மடல் போடுங்க.)?”

2. “இதுக்கு எங்க தலைவர் என்ன செய்வாரு டைரக்டரு சொன்னதை தான் செய்தாரு” அப்படின்னு அனானியா வந்து சொன்னா அசிங்க அசிங்கமா திட்டுவேன் அதையும் சொல்லிட்டேன்.

184. ஒரே கல்லுல இரண்டு மாங்கா

மே 14, 2007

மாறனின் ராஜினாமா, கட்சியில் இருந்து விலக்கல் எல்லாமே ஒரு நாடகம் மாதிரி தோணுதுங்க. அமைதிப்படை படத்துல சத்தியராஜின் உள்ளாடை துவைப்பதில் ஏற்படும் சண்டை காட்சியை கொஞ்சம் நினைச்சி பாருங்க. ஏதாவது தோணுதா? ஏதாவது ஒரு பிரச்சனை வந்தா அதை மறக்க செய்ய ஏதாவது ஒரு சண்டையை உருவாக்கணும், இல்ல சாதி கலவரத்தை உண்டாக்கணும். சாதி கலவரம் உண்டாகி ஏதாவது இசகு பிசகாயி backfire ஆகிவிட்டால் மைனாரிட்டி ஆட்சி கவுந்துடும் அது மொத்த ஆப்பு ஆயிடும். மதுரையில் செத்த நாலு பேரு கலவரம், இதனால் கட்சிக்கு ஏற்பட்ட அவப்பெயரை துடைக்க ஏதாவது ஒரு stunt அடிக்கணும். அது ஏன் இதுவா இருக்க கூடாது? யோசிச்சி பாருங்க இதனால் உண்டாகும் பயன்

1. கட்சிக்கு உண்டான அவப்பெயரை சுலபமா துடைச்சிடலாம். எத்தனை பேர் செத்தான் அதை பத்தி எவனாவது கவலை பட்டானா? அய்யோ மாறன் பதவி போயிடிச்சி அப்படின்னு இல்ல ஆகிப்போச்சி இப்ப.

2. இப்ப கனிமொழியை சுலபமா மந்திரி ஆக்கிடலாம். அப்படியே இன்னொரு stunt அடிச்சி இருந்தால் மிச்ச மீதி இருக்குற பேரன் பேத்தி நிதிகளும் மந்திரிகள் ஆயிடலாம்.

3. எவன் எவன் குடும்பத்துக்கு எதிரா இருக்கிறான் அப்படின்னு இப்ப தெரிந்துவிடும். பொன்முடி எல்லாம் மேட்டர் தெரியாம சவுண்டு விட்டுடாரு, விஷயம்/கலைஞரை பத்தி தெரிந்த பெரிய தலைங்க எல்லாம் கொஞ்சம் அடக்கியே வாசித்து இருக்காங்க. சவுண்டு விட்ட பார்ட்டிங்களை எல்லாம் இதுக்கு மேல ஒரம் கட்டலாம்.

4. நாளைக்கே எவனாவது கேள்வி கேட்டா “பாரீர் உடன்பிறப்பே கட்சி என்று வந்து விட்டால் சொந்தமாவது பந்தமாவது எல்லாருக்கும் ஒரே சட்டம் அப்படின்னு ஜல்லி அடிச்சிகலாம். உடனே திமுக குஞ்சுகள் அனைத்தும் புல்லரிச்சி போயி கோஷம் போட வசதியாக இருக்கும்”

இது எல்லாம் எனக்கு தெரிஞ்சி விழும் மாங்காஸ். எனக்கே இம்முட்டு தெரியுதே அரசியல் குரு கலைஞரு இன்னும் எம்முட்டு இருக்கோ? கொஞ்ச நாள் கழிச்சி தாத்தா என்னய மன்னிச்சிடு தாத்தா அப்படின்னு தயாநிதி அழுதுகிட்டே மன்னிப்பு கேப்பாரு. உடனே தலைவரும் “உடன்பிறப்பே தவறு செய்வது மனித இயல்பு அதை மன்னிப்போம் அப்படின்னு இலக்கிய நயத்தோடு டயலாக் அடிச்சிட்டு” தயாநிதியை கட்சியில் சேத்துகிட்டு அவரை அமைச்சர் ஆயிடுவாரு. இப்ப விசிலடிச்ச மக்கள் அதுக்கும் விசில் அடிப்பாங்க. வாழ்க சனநாயகம்.